بنات مكة ..


أتسائل كثيرا عندما أشاهد هذه الأحصائية عن السبب الذي يجعل الفتيات في مكة هم الأكثر عنوسة في المجتمع السعودي ؟؟ !

على الرغم من تنوع الثقافات والأعراق فيها .. وليست محصورة على العادات القبلية في زواج الأقارب أو نفس العائلة أو ( شريف وسيّد ) فقط ..

بالأمس وأنا أتكلم في هذا الموضوع مع أخي قال .. يمكن لأنو لسانهم طويل .. !

وأختي قالت .. أتوقع لأنه الناس ماتعرف أهل مكة كويس .. (آخذين فكرة غلط يعني )


عشان كدا أنا أبغى أشرحلكم وضع البنات في مكة .. طبعا أنا اتكلم عن الفئة العامة .. في أعلى وأحسن .. وفي أقل .. (ولكل قاعدة شواذ)

من الناحية العرقية : كثير من الناس يعتقد أن أغلب سكان مكة من الأفارقة وماشابههم .. ولاتوجد عوائل أخرى من أجناس مختلفة فيها .. الكلام هذا غلط .. أولا .. مكة تمتلأ بالعديد من الأجناس والعروق ( جنوب شرق آسيا , جنوب آسيا , بخارى , مصر , شمال أفريقيا .. الخ ) كما تمتلاْ أيضا بالقبائل والأشراف وغيرهم .. يعني الوضع خليطي :)

من الناحية الدينية : المجتمع محافظ جداً .. ومن الصعب أن يتقبل أي تغيير .. لذلك الفتيات في مكة من النوع (المؤدب) .. وملتزم بدينه وأخلاقه .. ومكة تنتشر فيها التحافيظ والمحاضرات والبرامج الدينية اللي يحضروا فيها الكثير من الفتيات .. بإختصار يغلب عليها التيار السلفي ..

من الناحية الأقتصادية : توجد في مكة كل الطبقات .. من الطبقة المعدمة الى الطبقة المخملية .. ويغلب عليها التوسط والأقل أيضا .. تتميز مكة بالتواضع في تعاملاتها الأجتماعية .. وبالنسبة لمدينة جدة مثلا .. فهي أقل تعاملا بمنطق ( الترفع و المظاهر ) عموما تتميز بالبساطة وعدم التكلف .. والبنات بيتحملوا مسؤولية يعني تلاقيها تطبخ وتغسّل وحتى لو ماتسوي عالأقل تعرف .. وفي كثير عوائل يدلعوا بناتهم بس لما يجي زوجها كل الدلع داك يروح وتسوّي الشغل دا كله ..

حتى في منازلها بسيطة ومتواضعة .. << زي ماقلت مو تعميم .. ومو معنى هذا الكلام أنو ماعندها فلوس .. ولا تغتروا بالبيوت البسيطة اللي تشوفوها ترا أهل مكة يخافوا من العين :)

من الناحية الثقافية : بالنسبة للتعليم ماشي في مكة .. وأعتقد جامعة أم القرى فيها أقسام ماتتواجد في مدن ثانية .. بس برضو الثقافة في بنات مكة محصورة على العلم والدين فقط .. وقليل منهم عنده اطلاع واسع على الأمور الثانية .. بس القليل يسوي كثير .. وفي بنات هزت البلد من مكة :)

من الناحية التعاملية : تصنيف غريب بس مهم .. يميز بنات مكة (كما أهل مكة ) بالعصبية والمزاجية وال(قواية) يعني ممكن تمسك وحدة وتشرشحها وماتسيب منها شي .. طبعا الشي دا يبان منه أنهم مستقيمات وماعندهم لعب .. وكمان على طبيعتهم ومايحاولوا أنهم يحطوا أقنعة تخدع الناس ..

أنا طبعا مااتكلم عن الكل .. بس هذا المميز واللي يعتبر قديم دحين .. أتحسنت أخلاقهم شوية :)

النوع اللي قلته فوق منتشر أكثر شي في ( الحواري ) .. بسبب طبيعة الطبقة اللي هما عايشين فيها .. ومو معناته مكة كلها بدي الطريقة ..

على قول وحدة من يوم ماأقلهم أنا من مكة .. يقولولي تعرفي شارع منصور ؟؟ !

آخر شي ..

أتمنى محد يزعل من كلامي .. واذا في أي غلط سامحوني بس أنا قصدي أوضحلكم الصورة ..

دحين ممكن أحد يعطيني جواب مقنع .. !!

About these ads

46 تعليقات

  1. عبد الله ..
    مع أني نفسي تقول وتخرج اللي في نفسك .. بس يلا مو مشكلة أمسكك على جنب بعدين :)
    أنا عارفة .. هوا اللي بيسير من الجهتين مو تماام ..
    بس يادله الكلام دا على مستوى المملكة .. أنت متخيل أعلى نسبة في مكة !! طيب يعني الشباب في المدن الثانية ماعندهم المشاكل اللي عند شباب مكة .. أكيد الا …
    وان شاء الله على ايامك يتحسن الوضع .. بعد كم سنة كدا :)
    نورتي يادُله :)

  2. مرة واحد سألني من كم سنة .. من فين تبغى تتزوّج ؟ .. قلت له يا مكة يا المدينة .. قال لا تاخذ من مكة ترى فيهم قواية ..

    يمكن هذه الإشاعة جابت لبنات مكة العنوسة ؟

    موضوع جميل و هادف أختنا هند ..

  3. بندر ..
    هوا صح بعضهم فيهم قواية .. بس عشان طبيعة المجتمع كدا .. بعدين قواية أحسن من أشياء تانية ..
    يمكن .. ويمكن أسباب غيرها برضو ..
    مرورك الأجمل .. :)

  4. عاشت هند ..
    انا أفهم من الموضوع هذا شي واحد بس .. انتي خايفه تعنسين صح ؟؟؟
    هند .. لا تضربين أمزح :-P ..

    حابه أزيدك من الشعر بيت ( ومن الطين بله ) ..
    إحصائيات الطلاق كمان تقول أنه أعلى شي في مكه .. وهذا الشي سمعته في قناة العربيه !
    وماني عارفه أيش السبب ويقولون أن أكثرها في فترة الملكه ..

    ويا ستي انا اللي اعرفه عن بنات مكه انهم طويلات لسان .. خخخخ وهذا الحكي من بنت مكّاويه والله :? !

    بس يقولون بنات الرياض أحلى .. وإذا زيي بعد ما عندهم حركات العنطزه أحلى وأحلى .. :-P !!

    هند .. خلاص لا تدفين خلصت !

  5. نوووف ..
    ياشريرة أنتي ..
    مو مشكلة حسابك معايا على جنب :)
    .
    .
    في فترة الملكة .. يارب سترك !
    أنتي عارفة مرت بيا أكثر من حالة فسخ خطوبة في دي الفترة ..! من جد حاجة غريبة ..
    مو كلهم يانوف لسانهم طويل .. شوفيني أنا قدامك يااختي عليا ماأضر ناموسة هعع
    أقول بس .. ترا الأحصائية قالت أنو الرياض المرتبة الثانية .. لاتفرحي كثير :)

    ..
    منورة ياقلبي :) << برضها تحبك

  6. موضوع حلو

    و على قولك ترا من جد أهل مكه بصفه عامة فيهم قوايه غير طبيعيه ، بس هذا الشي ينطبق على المكاويه إللي مازالوا عايشين فيها و متمسكين بشخصيات أجدادهم و عاداتهم

    و بصراحه القوايه تسحب طولة اللسان و هادي الحاجتين مافي أحد يستحملها إلا إذا كان قوي و لسانه أطول منه

    و أسأليني أنا عن القوايه

  7. اسراء..
    اييوة هوا دا اللي ابغى اوصله .. هما اللي مررة متمسكين بالعادات المكاوية ولسا فيهم صفات اهل مكة زمان يكونوا بدا الشكل ..
    بس الشباب اللي زينا مو كلهم تلاقي فيهم دا الشي ودحين مرة اتقدموا في كل حاجة ..
    المشكلة لما تكوني ف مجتمع قوي لازم تكوني قوية ..
    بس الشطارة انك تكوني قوية بحدود اخلاقك وماتنزلي نفسك للي اقل منك ..
    تسلمي ايسو عالمرور :)

  8. مساء الورد
    موضوع صريح و جريء
    أنا عاشرت بعض أهل مكه خلال تواجدي في جده لمدة سنتين .. صراااااحه فيهم قوايه مو طبيعية و لسانهم سليط شويتين ( و طبعاً هنا أتكلم عن اللي عاشرتهم في العمل ) .. و كانوا كثار مره .. لكن ستات بيوت على قولتهم .. و أنيقات جداً ..
    و في نفس الوقت أنا الأن وحده من أعز صديقاتي من أهل مكة بس مولوده و عايشه بالرياض و يقضوا إجازاتهم في مكه .. صراحه البنت و أهلها في منتهى الذوق .. لسان حلو و اجتماعيين جداً ..
    ..
    عموما قضية العنوسة منتشرة في كل مدن السعودية و السبب الرئيسي فيها أوضاع الشباب المادية .. يعني الأن عندي زميلات في عمري و إلى الأن ماتزوجوا ..
    حلو الموضوع .. يعطيك العافيه

  9. الحلو و المر في كل مكان… و كل شخص له و عليه و بصراحة انا ضد تعميم السلوك و اطلاق الصفات على مجتمع باكلمه..
    ( و أهل مكة حمام و أهل المدينة قماري و أهل جدة غزال )…. و عاشوا

  10. هند..
    أهلا أختي ..
    زس ماقلتي البعض في لسان طويل شوية .. بس هذا مايمنع أنه في ناس غير كذا .. يعني أنا عندك جلست 10 سنين في جدة وليا في مكة 9 سنوات .. قابلت كل الصنفين .. وفي بنات من مكة أحبابي وأصحابي وأعتبر نفسي مكاوية دحين .. بس طبعا جدة حبها في القلب باقي :)

    زي ماقلتي هيا منتشرة بس أعلى نسبة في مكة ؟؟ طيب ليش
    تتوقعي ممكن فرص الوظيفة في مكة أقل من غيرها ؟؟
    الله يعافيكي ان شاء الله ..
    شكرا عل المرور ياسَمِيّتي :)

    أمولة ..
    ياهلا بأهل المدينة ..
    اللي أعرفه أنكم مشهورين بالجمال :)
    ترا دايما يقولوا بنات المدينة حلوين :)
    وأنا هنا مو قصدي ابدا أني أسيء لأحد أو أقلل من قيمته .. بس نبغى الشفافية في الموضوع ومحاولة حله .. ومعرفة المشكلة جزء من حلها ..
    وراا وراا :D

  11. بصراحة انا ممكن اسمح بالديموقراطية والحوار والكلام هذا في كل شي الا في موضوع ” مكة ”

    عاد انا قريت في افضل التدوينات مكتوب كلمة بنات مكة وجيت مطفي النور اشوف مين بيغلط

    بس طلعت اسأت الظن

    اعتذر منك يا هند

    المهم شفت في بعض الردود كم شخص يشتكي من قواية بنات مكة

    بصراحة هذي ميزة مو عيب

    يعني مبسوطين على حال البنات اللي كلامهم مكسر ولسانهم معووج ومني عارف ايش

    بنات مكة معروفين حتى من مشيتهم مشيتهم فيها قوة مو دلع ومياعة !!

    وعندهم اتزان بين مشاعرهم وافكارهم ما تشوفهم يحطو نفسهم في موقف الا بعد تفكير طويل

    عندهم قدرة انهم يشيلو مسؤولية يعني يعرفو يمسكو بيت ويديروه من الألف الى الياء

    يعني لو اتزوجو وسافر زوجهم وانقطعت الكهربا حيعرفو ليه انقطعت سواء عشان فاتورة ولا مشكلة فيوز ولا غيرو بدون ما يقومو الدنيا كلها ويجيبو العالم كلو في البيت

    غير كدا اهل مكة عموما سهل الواحد يدخل معاهم جو لانهم جامعين بين خفة الدم … والدم الحار

    عاد طبعا مافي داعي أعيد اللي قلتيه يا هند عن المطبخ وعن الالتزام … يعني اغلب البيئات الموجودة محافظة

    صح لو الواحد يبا ينقد بلد مح يلاقي شي اسهل من كدا لكن الخير كلو موجود في مكة

    وانا عن نفسي اشوف سبب عنوسة بنات مكة هوا انو محد فاهملم

    الطلب دي الايام على المدلعات عشان يحطها في البيت وما تعرف تفرق بين فيش الكهربا وزر اللمبة

    عادي يا بنات مكة … العظماء دايما ينفهمو متأخر

  12. صارخ بصمت
    ههههههههه .. ياهلا بأهل مكة .. أيوة كدا تعالوا أوقفوا معايه شوية وخلونا نعرف نحل مشاكلنا سوا :)
    بصراحة كل اللي قلته صح .. وانا ماقلت دا الكلام عشان لايقولوا المادح نفسه كداب ..
    وأعرف بنات كانوا الشباب يوقفوهم في جدة ويقولولهم أنتي من مكة صحح أعترفي ..! << طبعا من المشية ..
    وبصراحة في مكة في بنات تسولى الف رجالة .. ومن جد تعرف تسوي كلل شي وماتحتاج لأحد ..
    ..
    المهم أنتوا ياأولاد مكة حاولوا تحسنوا الصورة معانا .. يعني بنت مكة ماتقبل أنها تكون مهي دارية عن شي .. بس لما زوجها يوفرلها كل شي هيا حتلتزم بشغلها وماتتدخل في مسؤولياته ..
    ..

    شكرا على رفع المعنويات :)

  13. الزواج قسمه ونصيب اولا

    وما اعتقد ان سبب تاخر الزواج عند بنات مكه
    سببه قوايتهم بس

    اكيد في اسباب اجتماعيه اخرى

  14. السلام عليكم ورحمة الله وبركاته

    مساء أحلى من العسل ..

    انا من بنات مكة ..بس عمري كله قضيته في الرياض >> احلى ايامي

    والحين رجعت بلدي أطهر مكان في الكون

    بس مو حاسة بالكلام إلي تقولونه .. وما اشوف عنوسة

    حولي صراحة ولا شباب متأخرين في الزواج ولا طلاق حتى الحمد لله

    سبحان الله ما احس إن في الغربية فيه عنوسة مثل الرياض والله صديقاتي بالرياض اعمارهم بالثلاثين ولا تزوجوا واعرف حتى اخواتهم بالأربعين والخمسين وما تزوجوا بعد
    ودائما اقول حنا عندنا حميمية في العلاقات بين الأسر .. وتلاقين الجيران يعرفون بعض وفيه مودة وروابط إجتماعية وتلاقين الكل يعرف بعض

    بس في منطقة نجد ما تلاقين هالشيء الجار ما يعرف جاره لو شافه بالشارع يقول له مين انت ؟
    والناس ما تعرف بعض والزيارات مقتصرة على افراد العائلة فقط ونادرة بعد

    فأتوقع هذا سبب العنوسة بنجد \\ البنت ما تطلع ولا احد يجيها شلون الناس يعرفونها

    وبعدين سالفة القواية وسلاطة اللسان هذه اشوفها فعلا بس مو عندنا صراحة .. اقصد لا بعائلتنا ولا قرايبنا كلهم .. حنا عندنا كلام الرجال يمشي على الرقاب .. بس الذكية إلي تميل راس زوجها بدون ما يحس وتخليه يسوي إلي هي تبيه بدون ما يبين عليها .. يعني بالحب تعمي عينه وتملك قلبه مو بطول اللسان والعصبية

    وعلى العموم كل شيء قسمة ونصيب وهذا قدر

    وما احد بياخذ غير رزقه إلي ربي كتبه له

    والإيمان بالقضاء والقدر خيره وشره مفروض علينا

    ومن قلبي ادعو لكل بنت بزوج صالح يسعدها ولكل شاب بزوجة صالحة تسعد قلبه وحياته

    تحياتي لك وآسفين على الإطالة

    • تسلمي على ردك اجمل من الجميل

  15. خوخة ..
    يمكن في أسباب تانية ..
    عاد أنت بنت مكة وعارفة الحال ..
    تحياتي لك :)

    amoure..
    اهلا أختي .. مساء النور ..
    الله يديم عليكي وعلى أهلك أن شاء الله وماتشوفوا مشاكل من دا النوع ..
    صحيح مكة فيها روابط حلوة .. اذا تبغي تطلعي قرابة كلل الناس تقرب لبعضها أو في على الأقل معرفة .. دا الشي مرة ملاحظ :)
    عن نفسي ماعشت بنجد .. بس برضو الشي دا معروف عندهم وأمكن من أسباب عنوسة البنات فيها ..
    بس انا برضو أعرف بنات كثيير من مكة ومهم متزوجين مع انهم بنات زي العسل ومافي اطيب منهم ..
    ..
    كلام الرجال يمشي عالرقاب .. !
    والله شي يخوف .. هوا صح البنت الشاطرة هيا اللي تكسب زوجها باللين .. بس هوا كمان يسايسها مو بس هيا اللي تسايسه ..
    آميين يارب وعقبال كل البنات والشباب ان شاء الله ..
    منورة مدونتي بوجودك ..
    لاتحرمينا هذي الطلة :)

  16. يا عمري والله .. اينوقه >> ما عرفت تدلعك ههههههههه

    الله يديم المحبة يا ستي وانا عجبتني مدونتك ماشاء الله
    وشكلي حدمن عليها وبتلاقيني هنا ناطتلك في خلقتك كل يوم

    إلين تزهقي وتقولي برااااا

    بعدين انا Lamoure أكلتِ اللام يا قلبي

    قولي لي لولو ينفع

    هذه مدونتي

    http://lamoure.wordpress.com/

    بس هي مش مدونة \\ فكرت اسويها زي المجلة خاصة بفنون الطهي وطرق إبداعية لتقديم الأطباق وإتكيت السفرة

    اتمنى تعجبك

  17. أمنية مكة وصلت طرييييييييييييييييق لحد يصدم <<هع

    والله ياهندو كلامك واقعي وصحيح لكن مااتوقع القواية هيا السبب لان في كل منطقه تلاقي القواية في البناااات واكثر من قواية بنات مكة…
    ترى اغلب الناس ماخذين فكرة سلبية عن بنات مكة،انهم عربيجيات وراعيات مشاكل ومضاربات ولسانهم طويييل ..انا ماانكر انه فيه شريحه بسيطة من دا النوع وهذا شيء يمكن يكون راجع لطبيعة بيئة وجو مكة الجاف والحار…..بس اللي انا شايفاه ان اغلب بنات مكة دحين مافيهم دي الصفات (يعني شوفينا احنا ياحليلنا مسالمات ..هاديات..دلوعات..ياااااي ماشاءالله علينا<<مصدقه نفسها)

    عموما هذه الاحصائيات بعضها ماتكون فيها مصداقية وغير كده اش السن اللي يعتبر بالنسبة لهم عنوسه؟؟
    كل مجتمع يختلف عن التاني في السن المناسب للزواج ومافي سن معين ممكن يعتبر عنوسه بسبب اختلاف نظرة المجتمعات ..
    من وجهة نظري احس ان هذي الاحصائية مبالغة شويه والله اعلم

    آسفة ع الاطالة <<يوووووووه مابغت تخلص هع
    معليش الموضوع اثار شجوني شوية :)

    يسلموا هندو ع الطرح الجميل :)

  18. بس كلمة صغيروووونة

    اشكر *صارخ بصمت* وانا أؤيدك مليون في المية
    يعيشوا شباب وبنات مكة :)

  19. لولو .. < <الدلع الجديد :)

    الله يحييكي يااختي والبيت بيتك ولا تتحشدي :)
    وأنا تسعدني زيارتك على طول ..

    وأمتعينا بألأشياء الحلوة في مدونتك .. << زحتلاقيني فيها على طول أن شاء الله :)
    نورتينا يااختي ..

    أموون ..
    مو هوا زي مايقلك الشر يعم والخير يخص ..
    وأحنا دحين اللي في يدنا نحسن دي الصورة من خلال تدويننا وتعاملنا مع الناس :)
    والله ياأمنية أنا مااقول انو الأحصائية دي غلط لأني شايفة ناس كثير مهي متزوجة .. ممكن يكون مبالغ فيها ويمكن صح مااعرف .. اللي أعرفه أنو الشي دا موجود ..
    الله يحييكي يااختي .. وأنا كمان أشكره برضو :)

  20. بسم الله الرحمن الرحيم
    السلام عليكم ورحمة الله وبركاته

    عجبا واقول عجبا كيف انت من اهل مكه وعندكم المشايخ والمفسرين للكتاب والسنه المطهرة ؟؟؟

    الم تقرائ //

    ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً ) (نوح:10)

    ( يُرْسِلِ السَّمَاءَ عَلَيْكُمْ مِدْرَارا ً) (نوح:11)

    ( وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارا ً) (نوح:12)

  21. إياد ..
    وعليكم السلام ورحمة الله وبركاته ..
    ونعم بالله ..
    صحيح الأستغفار سبب أساسي لطلب الرزق ..
    شكرا على التذكرة ..

  22. سلام عليكم ورحمة الله وبركاته
    الحقيقة أنا مصري ومحرج أقول الكلام ده لإخواني من البلد الحرام
    ولكن يشتكي المصريين ممن يسافر لمكة عادة من غلظة طبع أهل مكة وقسوتهم في التعامل مع الناس في مقابل هذا يمدح المصرييون دائما أهل المدينة ويصفونهم بأطيب الأوصاف
    ويعيبون على جدة ويقولون إنها توشك أن تتحول لقاهرة جديدة نسأل الله أن يسلم سائر مدن المملكة من أهل الفساد
    http://www.awdaelwa3y.wordpress.com

  23. والله اثرتي الجدل بقوة اينوقة :)

    من يوم مانزلتي الموضوع قريته بس ماحبيت ارد الا بعد ما اشوف ردات فعل المدونين

    رغم انو في ناس (مع) وفي ناس (ضد)

    بس مهما كان وباختلاف المجتمعات يظل لكل مكان ميزة وعيب

    وان كانت (القواية) عيب في نظر البعض ..

    الا ان القواية دي مستخبي تحتها بساااااطة بشكل ماتتصوروه ..

    ودايما اهل مكة قلوبهم على بعض ويدهم في يد بعض في الحلوة والمرة خصوصا انو مكة صغيرة وتقريبا في حلقة بتوصل بين العوايل دايما بشكل او بآخر ..

    انا بالنسبة للعنوسة ..

    فما اقول غير انه الزواج قسمة ونصيب واللي بياخد من بنات مكة كسبان اولا واخيرا لانه بياخد ست بيت وراعية اصول وقبل كل شي يمكن محافظة على دينها

    وفي النهاية .. كل البنات في اي مكان في منهم الزين وفي منهم الشين :)

  24. awdaelwa3y ..
    اهلا بيك أخي .. وكلامك مأخوذ بعين الأعتبار .. واللي بيسير طبعاً غلط .. بس على فكرة ترا دحين في توجيه كبير للمجتمع في تعاملهم مع الحجاج وأنهم ضيوف بيت الله ..
    أتمنى أنك لما تشرفنا ترا واقع أحسن من اللي سمعت عنه ..
    وأنا عن أهل مكة أعتذر عن أي تقصير في حقكم ..
    شكرا لك ..

    أوده ..
    اييوة كدا يابنات مكة حسنوا الصورة :)
    صحيح العلاقات الأجتماعية ممتازة في مكة وتختلف عن غيرها من المدن ..
    ها سمعتوا أيش تقول أوده .. تراكم كسبانيين :)
    أيوة صح زي ماقلتي ..
    واله يهدي الجميع ان شاء الله ..
    على فكرة احتمال نسوي اجتماع صغير في مكتبك :)

  25. خخخخخخخ اووووووهـ هذا موضوع قوي ولام نتناقش فيه
    اذا اجتمعنا بالحجاز ان شاء الله
    بس صدق ماقد سمعت احد تكلم بهالكلام
    والله في بنات حبوبات وطيبات وانا أكبر مثال
    دحين بنات مكة من كلامكم هم اكثر نسبة عنوسة واكثر نسبة طلاق وسمعت انوت أكثر نسبة يتركون اهلهم….
    جد الله يستر على البنات المسلمين

  26. * اقصد أنتِ أكبر مثال

  27. ليان ..
    ياهلا والله .. خلاص يبغالنا نعبي ورقة أيش حنتكلم لما نتجمع :)
    الله يسلمك .. أجل لاتسمعي لأنو الكلام مو حلو :(
    يب هوا دا اللي ساير .. بس طبعا أحنا هنا نبغى نعالج الموضوع ونشوف الأسباب ..
    بس يتركوا اهاليهم أول مرة اسمعها .. ماأعرف والله ..
    آمين يارب ..
    وتسلمي ياعسل .. :)

  28. awdaelwa3y

    أخي عودة وعي …

    تمنيت أن يأتي حكمك على سكان أطهر بقعة في الأرض أن يكون أكثر تأنيا ووعيا

    ليس لأنها أرضي وبلدي وأرض آبائي وأجدادي

    ولكن احتراما لبيت الله الحرام الذي نحن “من اتهمتنا” جيرانه

    على الأقل … لا تأتي بأحكام سمعتها

    حاول أن تتقصى الحقيقة بنفسك

    وبدلا من عين الناقد … انظر بعين المحايد

    وسترى أن ” أهل مكة ” أهل خير

    يكفي أن مكة تنفي خبثها

    أنتظر زيارتك لأرض الحجاز وأن تقدم حكما واعيا يليق بارض قبلة المسلمين ويليق بطموحاتك

    أخوك …

    برايفت لـ أيانق

    معليش يدي حكتني وما قدرت امسك نفسي وما أرد

    سامحينا

  29. الله الله الله ..

    اش هدا كله .. ؟؟

    والله المكاويات زعلانات .. ليه طيب ؟؟

    مرة سمعت من واحد انه فيه حرمة مكاوية تضرب زوجها ويسمعوا صوته وهم في بيتهم .. !!

    عارف انو هدا مو الأصل >> بس بأقول انكم قويات ولسانكم سلييييط .. (راح ثامر في خرخر)

    أنا خالتي من مكة وأخويا متزوج بنتها , بصراحة خالتي هذي أقوى وحدة من خالاتي في كلامها وشخصيتها ..

    بس بصراحة أهل مكة (يفقشوا كتيييييير) وبعبارة أخرى يبكشوا كتيييير >> يا ويلي ويلاااااه

    ما علينا ..

    بالنسبة لي أتمنى وحدة شخصيتها قوية أكثر من وحدة على طول تهز راسها ..

    بس بصراحة ما أتفق انه مكة يغلب عليها الطابع السلفي وأظن (الصوفية) منتشرة كتير .. لا أحد يفهم غلط ترى أنا أحب التصوف (المتزن) ..

    أحسني طولت .. بس بصراحة عجبني الموضوع :)

    وفي الختام ..

    مكة حق ميييييييييين … !!!!!!!!!

  30. صارخ بصمت ..
    خد راحتك .. :)

    ثامر ..
    أتشهد قبل كل شي بسرعة .. وأكتب وصيتك لاتنسى :)
    تضرب زوجها ؟؟ يعني زوجها المكاوي حيسكتلها مثلا .. اذا كانت الحرمة في مكة قوية زوجها أقوى منها بألف مرررة ..
    وكمان يبكشوا كثيير .. ؟؟
    أجل أنا ماأبكش أتشهد يالله :|
    المرة دي من جددد << ناوية نية سودا هع
    ..
    بصراحة الطابع السلفي والصوفي في تضارب كبير .. بس السلفي هوا اللي متفوق عليه .. ماعلينا أنا مشترية راسي من دي التيارين :)
    مكة حقتنااااااااااااا :D

  31. هههههههههه

    حلوه مكة حق مين ههههه

    ويا ايانق مو حقتنا

    مكة حقنا هههههههه

    والله جبتها ياثامر

  32. عبدالله ..

    مكة حق المسلميييييييييين :)

  33. الله الله الله
    ايش الحماااااس دا كله
    موضوع رائع واللي كاتبته اروع

    يصراحه انا مره متحيزه لبنات مكه واحبهم بس راح احاول اكون مع الحق>> بشويش علينا يا شيخه

    المهم بالنسبه لقواية بنات مكه انا اشوف انها شي عادي لانه عندي تعريف القوايه حقت بنات مكه
    (الدفاع عن حقوقهم )يعني بنات مكه
    مايسكتو عن حقهم اللي يحاول ياخد حقهم الله يعينه

    وبالنسبه للعنوسه احس انه شي مرتبط بالقسمه والنصيب
    وبعدين بنات مكه لاتخافي عليهم
    لو مااتزوجت الوحده فيهم تلاقيها بتحضر الماجيستير ولا الدكتوراه وتشغل نفسها
    …. عاشو بنات مكه

    عن جد ابدعتي يا احلى هند في مكه

    عارفه اني مره طولت بس اعذروني دول بنات مكه مو اي بنات …

    وفاء..

  34. كانت عيني مغلقة .. عن هكذا أشياء .. شكراً لك

  35. وفاء ..
    يابنت أنتي الحماااس والله ونورتييني ..
    الله يسلمك يااختي ..
    صح هوا دا .. القوايه مو معناته التسلط عالاخرين .. بس مايكونوا انهزاميين والواحد يسكتهم بكلمتين ..
    وهوا دا الصح..
    ..
    من جد وحتى لو مو في دراسة في انشطة تانية ولابتروح التحفيظ وتطور نفسها في الانجليزي وزي كدا ..
    عاشوا .. عاشواا عاشواا ..
    نورتينا يااختي واسعدتينا بوجودك .. :)

    هشام ..
    العفو .. أيوة كدا خليك مفتح :)

  36. هههههههههههه
    بصراحه يا ايانقاثرتي الموضوع وبقووة …
    طبعا بلا شك ان لكل بلد معين مميزات ومساوئ..
    لكن الاغلبية التي اراها هنا .. حاطين انو بنات مكة فيهم قواية
    كعيب لا كميزة …
    نجي نقارن بنت مكة مع اي بنت في المملكة ..
    بنت مكة قوية ولاعن عشرة رجال..
    تقضي مشاغلها بنفسها ما تنتظر الين ما يتكرم سيد الرجال يقضي لها مصالحها .. يعني بعبارة اخرى تعرف كيف تقضي شؤؤنها وتديرها على سنقة عشرة ..
    الشي التاني..
    الميوعة مطلوبة في الفتاة .. لكن ميوعة بنات مكة غييير عن كل شي.. تعرف متى تتميع ومتى تتدلع .. ومتى تسوي كذا .. يعني بالعامي مطبقة هذا المثل..( اللي عقلو في راسو يعرف خلاصو )
    الشي الثالث..
    في المعاكسات .. تلاقي البنت المكاوية الاصيلة .. مهما كانت اسرتها منفتحه .. تلاقيها عند المعاكسات صارمة .. واحد جا عاكسها ماتستنى ولي امرها يجي عشان يتفاهم معاه .. لا .. المكاوية والله يسعدها .. تخلع اللي فرجلها وتعطيه على وجهو.. وهنااكك ادوات اخرى للحرب..خخخخخ
    هذي بعض المميزات من وجهة نظري انا …
    طيب نجي للميزات العامة ..
    المكاوية .. بنت دلوعة ابوها .. زوجة حنونة لزوجها .. طيوبة ومرحة ودمها خفيف.. وقلبها ابيض ..
    ست بيت بمعنى الكلمة ..وعقلها يووزن بلد .. ودا اهم شي..
    طيب اما بالنسبة لأسباب العنوسة في مكة ..
    فمن وجهة نظري هي اسباب الخلافات على اشياء جدا تافهة تعتبر من العادات والتقاليد التي من المفترض ان تندثر…
    تدرووو ليش.. لأن بعض العادات ما تنفع الان في ظل غلاء الاسعار…
    واغلب الزيجات تتفركش عشان .. سوء الفهم الحاصل بين الزوجين .. او بتدخل اهل الزوج والزوجة فيما بينهم في فترة الخطوبة ..
    واغلب الزواجات تتفركش في فترة الخطوبة اي بعد الملكة ..
    لكن الحل الامثل للقضاء على العنوسة ..
    اول شي عمل جميعات خاصة بتيسسير امور الزواج..
    حصر عدد الاسرالتي تمتلك عدة فتيات .. رغم انو الحصر صعب..
    يشوفو عدد الشباب الراغبين من جد الزواج ..
    عمل الزواج الجماعي.. للراغبين .. والله هذي تقلل تكاليف كثييرة ..
    وضع صندوق لجمع اعانات لتساعد الشباب على فرش المنزل…
    بناء وحدات سكنية .. اوشقق واسعه .. تكون ملك الزوج .. والتخلص من شقق الايجار..
    هنا يجي دور العمدة … الله يرحم زمان اول العمدة بحق كان عمدة ..
    مو زي العمد حقون دحين .. اللي ما ينعرف الا غير اسمائهم .. وهذا وجهي لوعارف مين اللي ساكن عندو في الحي..
    يعني كان العمدة واسطة خير في امور الزواج .. كان الاب الكبيير في الحارة .. يروحو لو وياخدو مشورتو ايش رايك فلان لفانة . وعلان لعلانة ..
    وكمان اعغلب الشباب اللي يبو يتزوجو.. اهاليهم يدورو لهم على بنت طويلة ونحيفة .. وشعرها طويييل.. وعيونها زرق وسيعه .. وماالى ذلك من مواصفات ..
    بمعنى اخر تركو جمال الروح واتجهو الى جمال الشكل..
    ونسيو انو الزواج تحمل مسؤولية ولي تمتمع بالجمال فحسب..
    اقوول طولت عليكم واتفلسفت على راسكم كثير..
    بس هذي وجهة نظري…

    والسلام عليكم ..

  37. عيون الوجد ..
    ياهلا ومرحبا فيكي نورتيني في مدونتي الله يسعدك ..
    من جد والله تلاقيها تعرف رقم السباك والنجار والكهربائي وتعرف من فين تتعبى جوالين الزمزم وهدي المشاوير ..
    والشي الثاني في الميوعة والدلع .. طبعا تعرف تتدلع زيها زي أي انثى ..
    في المعاكسات زي ماقلتي مؤدبة وماعندها تفاهم .. ومن جد ممكن تتطاول عالرجال اللي بيعاكسها وترميه بأقرب حاجة << ويااما سمعنا قصص عن كدا :)
    على مشكلة العنوسة بتظل دي الاشباب الرئيسية في كل البلدان .. وامكن في مكة اكثر مااعرف بس انه دي الاسباب الازلية لازم الواحد يشفلها حل .. وماشاء الله ياعيون الوجد ماسبتي شي ماقلتيه ح نعينك مستشارة وحلالة مشاكل وعمدة كمان :)
    ^
    ^
    بالنسبة للصفات الشكلية ياشيخة منتي دارية هما يبغوا حورية من الجنة ولا بنت عايشة في الدنيا .. لكن اللي يهتم بالشكل هوا اللي ح يندم بعدين ويقول قالتلي عيون الوجد :)
    اشكرك مرررة كثير على تعليقك المميز وعلى تفاعلك معانا
    ونورتي المدونة ياعسل ..
    وعااااشوا بنات مكة :D

  38. يعني مثلاً اذا كنت فلسطيني مولود و عايش في السعودية ، هل سيقبل أحد من بنات مكة أن تتزوجتني؟؟؟؟؟؟؟؟؟؟؟؟؟

  39. سلام عليكم ورحمة الله وبركاته
    اخواني الكرام
    والله أنا ما من الله عليه بزيارة مكة قط
    أنا كنت في الجيش المصري وكنت ممنوعا من السفر وكنت أبكي في موسم الحج طمعا في زيارة مكة وأتمنى لو يمن الله علي بالموت في مكة في الحرم المكي
    أنا مشفتش حاجة
    إنما كل شئ بالسماع
    نسألكم الدعاء لي بزيارة البيت
    جزاكم الله خيرا

  40. والله يا زين بنات مكه مافي زيهم من جد بنات

    اذا تبغاها بنت بنت واذا تبغاها رجال رجال تتحمل المسؤليه ..
    احسن تكون قويه والقوه مو عيب ولا تكون سوسه من تحت لي تحت.. غير كذاا بنات مكه طيبات وحبوبات وعشريات مرره.. وانا اشوف سبب العنوس اكثر شي في بنات الاشراف <<<<<<<<<<<<<<<< وانا منهم متي بس تنحل يا رب واتزوج.. قولو امين يارب..

    وغير كذاا احس الكل لما اقول مكه كاني قلت شي مو كويس

    ايش السبب يا بنات ؟؟؟؟؟؟؟؟؟؟؟؟؟؟

    انا اشوف فضل بنات بنات مكه في كل شي..
    بس الله يهدي الشباب ويتركه من الاجنبات والله الاجنبيه ما تبغاك لي سواد عيونك .. وانت عارف كذااا
    تبغي الفلوس وبس …

    الله يسخر لك بنات مكه بزواج يارب ويسعدهم ويوفقهم يارب

  41. السلام عليكم ورحمة الله
    لا أظن أن أهل مكة يمكن أن تجمعهم أي صفة أو ميزة أو حتى عيب .,

    يعنى إذا دخلت مكة لأول مرة في حياتك ., فافترض أن كل الناس في مكة مثلك ., أي :. مسلم ساقه الشوق إلى رحاب أم القرى
    وبما أنها أم القرى ففيها لمحة من كل بنت (قرية أو مدينة ) من بناتها .,

  42. السلام عليمن ورحمة الله وبركاته
    يسعد مساء الجميع
    بعد الشكر والتقدير
    اتمنى اسجل ملاحظتي بدون زعل او كلل

    اولا انا مااتكلم عن الكل بس في كل بلد وكل جنس الصالح والطالح
    الطيب والخبيث

    بس اتكلم عن تجربتي ومااعمم
    صادقت بنات من مكه
    صراحه في البدايه
    قمة الذوق
    والاحترام

    وبعدها ….لاتعليق

    من كدب ولف ودوران

    المهم لما احكي اي احد من صحباتي

    يقولوا ماجيتي تعاشري الا بنات مكه

    معروفين بالنذاله وينخاف منهم

    بدون زعل ومع احترامي للكل

    وهذي مو قاعده

    واذا كان على طولة اللسان والقوة
    في الحق

    دي الصفات عمرها اكانت عيب

    بالعكس لكل انسان شخصيتو
    والمؤمن القوي خير من المؤمن الضعيف

    بس بصراحه كدى ومن دون زعل

    بنات مكه من تحت لتحت

    وبرضو اكرر مو الكل

    بس اهل مكه معروفين بمقولة
    “السنة حداد”

    وصف لي ارضا اصف لك اهلها

    ومعروفين بالقلب القاسي

    بحكم الجبال الي عندهم

    حتى الحجاج لما يجوا المدينه يقولوا فرق كبير بين اهل مكه والمدينه

    اهل المدينه قلوبهم رقيقه
    وفيهم طيبه

    واذا على العنوسه
    دي قضية العصر مو بس في مكه

    في البلاد كولها

    ربي يكرم الجميع بالزواج الصالح والذريه الطيبه

    وشكرا لكم

    وزي اتفقنا

    اختلاف الراي لايفسد للود قضيه

    اختكم

  43. السلام عليكم,,بما إني من مكه والله مااشوف هذا كله مشالله الزواجات مايصدقون تجي الاجازات 3-4 جوازات بالاسبوع دليل انه عادي البنات في مكه بيتزوجون مشالله وفي رايي انه بنات مكه احسن بنات من كل ناحيه مشالله يعرفون يصرفون في كل شي وفراجاااءا افهمونا زين ولاتاخذكم العنصريه و((لافرق بين عربي ولاعجمي الا بالتقوى))واعيد مرره ثانيه بنات مكه زين ورقه ويندم اللي ماياخذ من بنات مكه وفيه منهم الدلوعات وفيه العربجيات وفيه وفيه مثل كل مدينه من مدن المملكه بنات مـكـة هذولي أحلى بنات * رقه وشقاوة وسكر نبات

    تسمع منهم أحلى الكلمات * كل الدلع فيهم بالذات

    بنات حلوين بنات طعمين * على بنات مــكــة راح تطيح العين

    لحد يقول بنات وحشين * راح تدورعليهم شمال ويمين

    كل شي فيهم والله جذاب * واللي يقول غير كذا أكيد كذاب

    الرجاء الالتزام بقوانين الكلام * مع بنات مــكــة تتكلم باحترام

    هادي حقيقة واسألوا الشباب * ماراح نوفي لو ألفنا كتاب

    جمال {البيضا} يخليك تحتار* رقه وذوق لو جيت {للسمار}

    بنات مـــكــة افهموني يا ناس *قلوبهم نضيفه مليانه إحساس

    مكانهم في العين فوق الراس *لأنه بصراحة معدنهم ألماس

    بنات مــكــة ماتوصفهم بالكلام * من أدبهم الزايد فيهم احترام

    الفله فيهم الخجل من صفاتهم * الدلال والدلع هاذي عاداتهم

    الله يخليهم لنا ويحميهم * بنات مــكــة محد يساويهم
    وبس وشكرا ع طرح المضوع وتقبلوا ردي لاني بنت من بنات مكه.

  44. سلام عليكم
    انا من مكة وبصراحة
    اشوف انه فيهم قواية صح
    لكن مو كلهم بالعكس بداو
    يقلو في الفترة الاخيرة

    بعدين ما اسمح لأحد يتكلم عن
    بنات مكة بطريقة سيئة هع

  45. السلام عليكم انا شاب من مكه اريد الزواج من امراة اميلي سكاي بي ahmed558180

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s

Follow

Get every new post delivered to your Inbox.

%d bloggers like this: