فضفضة ..

مجرد فضفضة لا أكثر .. اللي ماعندو وقت لايقرأ


 

أسبوع آخر مرهق .. من يوم السبت اللي كان عندي فيه اختبار صعب .. بس الحمد لله أني حليت ومشيت فيه .. الى يوم الأحد اللي تعبت رقبي فيه

 

ومني قادرة احركها .. ليوم الاثنين اللي قمت قبل اذان الفجر وخرجت من البيت الساعة 7 ما رجعت الا 5 العصر ..الى يوم الثلاثاء من 8 ل4

محاضرات..!

تقريبا لم اجلس مع العائلة هذا الاسبوع الا لحظات قليلة .. اكون بعدها في نوم عميق أو في الجامعة .. اخويا من بداية الاسبوع ماشفته ولا اتكلمت معاه

الا على الماسنجر ..!

الحمد لله انو عدى على خير .. أهم شي فيه أني خلصت واجب كنت مرة شايلة همه .. الواجب كان عبارة أني أصّور روضة وأكتب عنها مع

الأخراج الجيد ..

 

الحمد لله تمت المهمة بنجاح .. بمساعدة صديقتي فاطمة .. وتم تسليم الواجب .. شكرا يافطوووم 🙂

 

وحصولي على درجة 23 من 25 في أحدى مواد التخصص .. الحمد لله

زرت في هذا الاسبوع مكتبة الجامعة اللي عندي كلام كثير عنها وحااكتب عنها بشكل تفصيلي ( اسعارها المرتفعة , خدماتها السيئة , أسلوب المعاملة ,

 

الزحمة غير الطبيعية )

تجارة المذكرات << كما أحب أن أطلق عليها بدأت بشكل مكثف بمناسبة آخر الترم .. مايحقلهم لازم يحللوا آخر ريال في مكآفآت الطلاب .. بصراحة

 

شي غير طبيعي .. المادة الوحدة فيها 4 – 5 مذكرات في الترم .. المذكرة الواحدة ب10 ريال على اقل تقدير

 

 

يعني لو جينا ضربنا 40 (سعر كل المذكرات ) × 500 (طالب يدرسهم الأستاذ )= 20000ألف !!!!! وماخفي كان اعظم

 

 

 

أعلنت منذ فترة عن اضرابي عن جميع المأكولات والمشروبات وحتى الحلويات التي يتم زيادة سعرها في الجامعة .. يعني الفليك من يومنا نعرفه

 

 

بريال كيف سار ب3 ريال !!

الشاني بريالين !! التوكس ب4 ريال !!

 

ليس بخلا مني ولكن حتى نضع حدا لجشع التجار وغلاء الأسعار .. واجهت تعليقات من صديقاتي يقولولي فرقت يعني على ريال ؟؟

 

أقلهم أيوة فرقت ريال على ريال يساوي ريالين . 

 

    واحيانا يقولولي خلاص احنا نحاسب .. فأمنعهم قائلة : اقدر ادفع بدل الريال عشرة بس الشغلة شغلة مبدأ

 

واحيانا أتعمد السؤال عن المنتجات .. وأقول للبائعة بأدب : ماكان سعره بريال !!

      الأسبوع الجاي حيكون أسبوع اختبارات المواد العامة .. واللي بعده حنبدأ الأختبارات ..

 

 

صح بالمناسبة لازم أقلكم على الجدول الأليم اللي تعبت ادارة الجامعة على وضعه لينا .. وماانسى اشكر اللي حط الجدول على مراعاته لينا كطلاب

 

 

                وتفهمه لمواعيد اختباراتنا .. ولا كيف يحطلنا 8 مواد تخصص من العيار الثقيل في 4 أيام + مادة يوم خميس !!!

 

 

الايام الجية حتكون ايام حافلة .. التكريم اللي سار رفع معنوياتي اني أشد حيلي أكثر وأرفع معدلي .. لاتنسوني من دعائكم ..

 

 

اشكركم ع صبركم في قراءة الموضوع 🙂

Advertisements

8 تعليقات

  1. ياحبيبتي ياايانق هوا دا كله مخبياه عننا ليه؟؟؟خخخخخخخخ

    والله صادقة في كل كلمة قلتيها
    وكله ولاالسعار الزايدة دي
    اما المكتبات فصرت محرم ادخلها واذا جات عالمذمرات اخذها من صحباتي الله يخليهم واصورها بره ارحم

    والجدول الله يعييينك وييسر لنا الاختبارات
    وعقبال المعدل الاعلى ان شا الله 🙂

  2. وما أدراك ما سحر الفضفضة ؟!! هههههههه

    أما سالفة النوووم المسكين اللي ماله وقت فهذي حكاية ثااانية.
    بس
    الله يكون في عوننا دوماً ..
    و ينتهي الترم على خير.

    و بالتوفيييييق يارب , و عقبال ما اشوفك منورة كل حفلات التكريم .
    ( معجزة .. أول وحدة أعلق )

    تحياتي الصادقة لك دوماً

  3. معليه امونة ما انتبهت انك علقتي قبلي ..
    ربما لم يحن موعد المعجزة بعد ..
    هههههههه
    معليه ايانق على الخطأ الفني …

  4. حلو الواجب تبع الروضه
    اي والله تفرق هوا الريال شويا ولا شويا
    ازا تبي اقولك اش يسوي الريال <<<<امزح

    الله يعينيك ويعيننا علاختيارات
    ويعيدها على خير
    🙂

  5. اول شي مرررة معليش ياجماعة عالكلجة في الموضوع .. ترا دوبي اللي انتبهت .. برضو كان تحت تأثير التعب

    أمنية ..
    ايوة ياامونة ماكنتي دارية عني .. طبعا ايش يهمك من يوم ماتسير 12 خارجتلنا من الجامعة .. سندريلا الظهر هععع
    المشكلة احيانا تنحوجي ليهم ..ومو على كيفك لو اصلا المذكرة تنباع في دي المكتبة 😦
    آمييين يارب الله يعين الجميع .. وعقبالك أنت كمان .. ياويييلك لو نزل معدلك حجلسلك بالباكورة 🙂

    تسلمي أمونة 🙂

    نيسي ..
    ههههه انتي اكثر وحدة عانيتي معايا بعد اهلي عالنوم .. المشكلة مااحس بنفسي ومن جد انام وانقطع عن الدنيا بطريقة مو طبيعية ..
    بس الحمد لله انو مشي ااسبوع 🙂
    حتسير المعجزة يوما ما … مو اكثر من معجزة اني اشوفك في صفحة مدونتي ولا كنت احلم بيها دي 🙂

    الله يخليكي يارب 🙂

    خوخة ..
    عيونك الحلوة ياستي 🙂
    اوووه عاد مايحتاج ندرس عندك ايش يسوي الريال << شغل حض.. هعع
    امييين يارب .. وبالتوفيق للجميع ..
    شكرا على مرورك 🙂

  6. من جدها الجامعة يعني تعطيكم مكآفات من هنا .. يأخذها فليك وتوكس من هنا 😐

  7. FEMALE..

    لو بياخذها الفليك والتوكس قولي الواحد يستغني عنها .. بس المذكرات اللي مايعرفوا يجمعوها مرة وحدة وتنزل .. ولا اصلا ليش مذكرة كتاب زي الناس ينزل نشتريه من المكتبات وانتهينا …

    الله يعين بس
    شكرا ع مرورك

  8. […] فكرة .. ماذكرته في موضوع فضفضة ليس مقتبس من هذه الحملة .. فأمتناعي أنا لايؤثر في مجموع […]

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: