الشاعر \الشاعرة

 

أول شي لازم تقولوا مبروك على نزول دا البوست .. من جد لو تعرفوا الحكاية حقتوا من زمان أبغى أكتب ومني لاقيه صياغة مناسبة له .. اليوم وأنا في خط جدة قلت يابنت مالك الا العاامي .. وطلعي كل اللي في قلبك وبعدين شوفي ايش رأيهم ..

ودحين دوبي جيت وقلت لازم انزله ولا محا اقدر أسوي ولاشي .. أو حيبرد الموضوع ولا حأقدر أكتب فيه مرة تانية ..

المهم .. الحكاية ومافيها .. أني أبغى أتكلم على الرسايل بين المخطوبين .. الخاطب وخطيبته .. يعني أنا قابلت حالات بنات طبعا ماأعرف اذا الأولاد عندهم زيها ولالا بس أكيد في ..

البنت تكون ماشاء الله عليها مرة تعرف تكتب ومن هيا بنت .. وأكيد ممنية نفسها يجيها واحد فاهم ويكتب شعر زي الناس .. وتتفاجأ بزوجها اللي جلست تكتبله رساله طول الليل فاتح فمه ولا هوا عارف ايش مكتوب اصلا ..

ولا يجي يبغى يرد عليها ويكتبلها شعر .. وهوا لايفهم لافي شعر ولا نثر ولا يحزنون .. ويجلس يكتب كلام لايجي لايمين ولاشمال .. وهيا المسكينة تبغى تضحك وتبكي على حضها المنحوس ..

ولا واحد من الطرفين مثلا يروح يجبله كلمتين حلوة سارقها من واحدة  من المنتديات ويجي يلصقها في كرت ويلا اللي بعدو ولايخلي صاحبه الشاعر ولا صاحبتها الشاعرة تكتبلها (ودي سارت حقيقي) ..وهيا المسكينة(وهوا المسكين) تحسب الأخ قيس \ليلى وتطير من الكلام المكتوب وبعدين تتفاجأ أنو ملطوش من واحد من المنتديات !!!

ايش رايكم بالله ..؟

ايش أحسن طريقة الواحد يتعامل بيها مع الطرف التاني .. ماقلنا شي الشعر والنثر والكتابة بصفة عامة موهبة من الله .. لكن لما أعرف انو الطرف التاني شاطر في دي الاشياء وانا لا ابينله اني مااعرف واخليه يعلمني .. والطرف التاني يتقبل الموضوع بأريحية .. واذا كنت لازم أكتب عن مشاعري .. أكتبها كلام عادي بالعامي كمان زي ماأنا باكتب دحين ..وطبعا مااحد يتريق عالتاني ..

وزي مالكل عارف ا لكلام اللي يخرج من القلب يدخل للقلب على طول .. فمافي داعي انو يتكلف ويجلس يحوس في عمره ..

ولايسوي الشي الاسوء أنو مايكتب شي ويودي الهدية بدون حاجة .. بالله مرررة مالها داعي

اخيرا ..

أبغى آرائكم ..

مواقف شفتوها أو سمعتوا بيها أو  وحصلتلكم شخصيا ..

ورأيكم في الكلام للي أنقال ..

آخر شي << والله آخر شي خلاص ..

أغنية سمعتها من قبل سنة تقريبا .. وعجبتني ..

الأغنية بالحجازي .. لواحد مغنيها لحبيبته..

اللي عجبني فيها صدق الكلمات وبساطتها .. وان شاء الله تعجبكم انتوا كمان ..

الأغنية هنا

الين هنا أنا مني قادرة أكمل .. سلام

 

Advertisements

24 تعليق

  1. ما أدري عن الموضوع دا
    بس أنا أخاف لو انخطبت
    تطير كل الكلمات وما عاد أكتب ..

  2. ما تكفي لغة العيون ؟

  3. شدا ..
    ليش تطير .. انت هنا خلاص بتبدأي تحددي في كلماتك .. مو شي خيالي زي لما بتكتبي وانتي بنت ..

    بالعكس احس انو اللي ماعمره طلع منه شي يطلع .. كيف بوحدة زيك ماشاء الله ..

    بندر ..
    طبعا محا تكفي .. ايش حتكتب عالكروت ؟؟

  4. ياستي هي فرقت يعني

    آخرتها كلمة أحبك هي الأساس ولو كان الطرف التاني ما يعرف يكتب يقول أحبك و الله يخليك ليا و لا يحرمني منك و من كلماتك إللي ما أعرف أكتب زيها

    و ترا المواهب أحيان كثير تندفن من أيام الخطوبة

  5. اسراء ..
    هههه .. صح مو هوا دا اللي بااقوله لو مايعرف يكتب .. يقول اللي في قلبه وانتهينا ..

    بس بالله لما يكون واحد فاهم\وحدة فاهمة ماتفرق معاها !!

    المواهب تندفن !! من جد كنت احسبها تنتشي وتزيد 😦

  6. عادي يا هند تشوفي ان البنت كتّيبة والشاب العكس.. دايماً البنت مشاعرها تكون خجلانة وما تقدر تنظقها وتقولها عن طريق الكتابة.. عكس الرجال او الشاب اللي بيكون الكلام الحلو على لسانه دايماً :P..

    ان تكفيني نظرته لما يجي يعطيني الهدية .. تكفيني لما يقول (أحبك) بكل احساس.. ويكفي خوفه عليّا عن مليون كلمة يكتبها بدون احساس..

    ايام الخطوبة دايماً البنات يكونوا شاعريات اكتر.. لأنهم لسة في بداية الحب.. وطبيعي في دا الوقت القريحة تشتغل عندهم!! لكن لما يفتّحوا مخهم يعرفوا انه اهم شي الاحســـــاس اهم من كل كلام الدنيا..

  7. موضوعك حلو
    بس مدري :/
    عجبتني الأغنية
    🙂

  8. اسماء ..
    طيب لو انها حاجة تكفي (( الكلام)) ليش البنت تتضايق أنه مابيكتبلها كلام حلو ..

    كلامك مرة منطقي .. واحنا لسه في البيضة ماعرفنا الدنيا 🙂

    روز..
    انتي الاحلى .. حتى انا عجبتني 🙂

  9. والله شوفي ..

    أنا عانيت فترة الخطوبة من جهة خطيبتي ..

    أقصد فترة الملكة ..

    على قد ما كتبت لها كلام حلو , وعلى قد ما أرسلت لها

    ما أتذكر ولا رسالة منها شدتني ..

    المشكلة انه الشعراء اللي زيي (واسألوا بندر) مو أي حاجة تعجبهم

    لكن والله زي ما قلتي الكلام اللي طالع من القلب يوصل القلب على طول ..

    وأنا بيني وبينك أفضل الكلام اللي الواحد يكتبه بنفسه , بعيداً عن القص واللزق

    بالنسبة لي أقدره والله كثيراً , بينما اللي ما يعجبني اللي ينقل (وبالذات أبيات الشعر العامي) – يعني نزار قباني مو مشكلة “قصائده حلوة” بس شعر عامي (مع احترامي لعشاقه) ما يروق لي أبداً

    وجهة نظر ..

  10. أهلا .. ثامر
    صح الشاعر مو اي حاجة تعجبه .. لكن ممكن يمشي وممكن يعلم اللي قدامه ..
    وطبعا ماينسى انه هادي موهبة زي ماهيا موجودة فيه ماهي موجودة في غيره .. وممكن الطرف الاخر يكون عنده موهبة ماتكون فيه .. قدرات من الله !

    فكرة النقل واللصق ابدا ماأأيدها .. الا اذا أشار ليها أنها من أبيات نزار مثلا أو شوقي .. لكن بدون مايشير ليها مرة مو حلو ..

    أما الشعر العامي .. 🙂

    أشكر مرورك وزيارتك ..

  11. يعني موهبتي راح تندفن !!

    شوفي صراحة أنا ممكن في الخيال أشطح في الكلمات
    بس أخاف لو صار واقع .. ما أعرف أعبر وأكتب ..

    😳 😳

    <– شردت !

  12. شدا ..
    مدري يقولوا كدا 😦

    لالا شدا ماشاء الله عليكي صدقيني 🙂

    <- وراك وراك والزمن طويل هعع

  13. عجبني الموضوع

    ان شاء الله اتذكر اعلق

    عندي تعليق طويل شويا

  14. ملياني ..
    خلاص نستناك ..
    مو تنسى زي موضوع أولويات :s

  15. والله يا أيانق..

    الكلام يوصل من القلب للقلب.. من غير لا شعر ولا نثر..
    أنا لما أنخطب.. علاقتي مع خطيبي أبغاها تكون مختلفة.. بعيدة عن أي تقليدية تخلقها الكروت والقصائد..
    وبالنسبة لي أنا.. آخر شي يهمني إنه يجيني واحد يكتب شعر!!!
    وأنا مع إسراء.. الله يخليكي ليه ولا يحرمني منك لما تكون من قلب.. عندي بألف معلقة شعر…

  16. موضوع رااااائع
    لكن ع قولة بندر يكفي عيونه واحساسه انه يحبني وكذا
    شخصياً ماراح انتظر منه انه يكتب لي كلام
    بس يحسسني بحبه وخوفه عني واشتياقه لي يكفي
    وبعدين المفروض البنت اهي يللي تكتب وتتفنن
    الرجل وخاصة الشرقي وبذات السعودي حتى وان
    كان شاعر مااحس انه راح يبدع بالكتابه عن خطيبته
    ومووفقه يابعدي

  17. نجولة ..
    🙂
    كل واحد وطريقة تفكيره طبعا ..
    اكيد اي كلام من القلب ولو احبك .. احسن من مية قصيدة مو من القلب ..
    اشكر مرورك..

    ليان ..
    انت الاروع ياقلبي ..
    ايييوة عاد مايحتاج عارفين الرجل الشرقي وطبعه ..
    الا ماقلتو مو احسن الزواج من غير السعودي 🙂

  18. اهم شي يكون الكلام طالع من القلب 🙂 .. ولا يهم لا وزن ولا قافيه ولا اي اي شي ..
    بس يكون كاتبه بنفسه ومن جواة ألبـو …
    وبس … (L) ..

  19. أيانيق …

    كان في عيني النوم …. والنعاس يغالبني
    لكن البوست دا … لااازم أرد عليه قبل النوم عشان الكلمة اللي براسي ما تضيع …

    أسمعي يا ستي …
    أنا لا أسرق كلمة من النت ولا أخلي صاحبي الشاعر يكتبها
    أنا أرسم وأصمم الكرت … وأعطيها هيا اللي تكتب ..{{{ هههههههه شايفة كيف فتك أنا ؟؟؟

    لا لا .. عن جد … راح أعبر بأسلوبي الخاص والكلام مو هوا الوسيلة الوحيدة … في أكثر من وسيلة

    زي ما قال بندر … (لغة العيون)
    وزي ما أبغى أسوي أنا .. (الرسم)

    ملحوظة على جنب كدا: يمكن أرسم وأصمم .. وآخد الكلمات من أبويا … (طبعاً نرجع للخبرة … ههههه)

    يلا بروح أناااااااام

    سلاااام

  20. يا شيخه مبرووووووووووووك ..
    وأخيراً كتبتيه .. .. 🙂 ..

    رد أسما حطمني !
    انا ما أعرف أعبر عن مشاعري بكتابه ابدااا ..
    ما أعرف أكتب كلام حلو 😦 !
    تعرفين .. .. انا لسه ما جربت بس أي مشاعر أحس فيها تكون ( مشتعله ) من جوا ..
    بس اني أعرف أطلعها .. لا 😦 !
    وأصلاً ما أبي شاعر .. يقولون ان الشعراء كذابين 😕 !

    انا ما ابغى أقرا .. أبغى أسمع وأشوف 😉 ..

  21. نوف
    ترا أول مرة أرد بتفاؤل في دا الموضوع 😛 أي تحطيم هااااااا :$

    ترا لا تتحطمي طالما انك تبي تشوفي وتسمعي ترا الشعب السعودي أكتر شعب يقول كلام حلو بس دققي عاد في العيون لو الكلام من قلب أو لا 😛

    هههههههههههههه قلت لك نوف لما تنخطبي قولي لي بعطيك دروس خخخ

  22. هذيان ..
    طبعا كلام القلب أهم شي 🙂
    تسلمي على مرورك ..

    tag200sa..
    اهلا بيك ..
    امم ممكن فكرة حلوة انك ترسم وتصمم خصوصا اذا هيا كانت تحب الرسم وتفهم فيه ..
    يعني ماشاء الله ابوك شاعر ؟

    نوفا ..
    الله يبارك فيكي .. الحمد لله مابغى ..
    امم .. امكن تبدأ تظهر لما تنخطبي .. يعني المشاعر تكون غير مرة عن اي مشاعر ..
    بعدين مين قلك الشعراء كدابين .. هما مزاجيين صح بس مو كذابين 🙂

    اسماء ..
    سجليني معاكي في الدروس ..

  23. هوا مو شرط يكون شعر
    لان مو كل مين يقدر يكتب شعر
    يعني كلمتين صادقه حلوه تكفي

    والكلام اللي الشخص كاتبه بنفسه يرسخ في الذهن اكتر
    ولو لطش كلمتين وقعد فتره يحفظها اعتقد بعد فتره
    يناساها لانه مو هوا اللي كاتبها

  24. موضوعك عالوتر يااينوقه

    بصراحه كل ماكان الكلام بسيط وطالع من قلب كل ماكان وقعه عالقلب اعمق واحلى
    ولكن برضو حتى الشعر والخواطر لها وقع اكثر اذا كان الطرف الاخر ملما بها ومهتم
    فكرتيني بموقف صار لي
    وحده من قريباتي وصديقاتي المقربات يوم ملكتها ارسلها خطيبها رساله يشكر الله ويحمده على ان اتم عليهم هذي النعمة ويدعي للي سعى بينهم
    على طووووووووووول اتصلت عليّ تقولي الحقيني ابغى ارد عليه مني عارفه
    الفي كلام حلو عشان اعرف ارد بسرعه ،،،،ومن هنا ورايح تقولي انت تعرفي تكتبي اكتبي وانا ارسل 🙂
    بس من وجهة نظري احسها بايخه او مااحس اني بكتب من قلب لاني ناقشته من غيري 😦
    يسلموا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: