أفراح ..

 ( الموضوع مايهمكم كثير ياأولاد ..)

 

 

امتدت المناسبات الاجتماعية بشكل ملحوظ .. منذ اجازة نصف العام ( الاسبوع الاجازة )الى الان ..

في الاسبوع الاجازة تقريبا مرت عليا 5 او 6 ايام ورا بعض كللها مناسبات وافراح .. ومع اني لست من النوع اللي يحب الافراح ويوجب على الناس .. بس رحتها كلها J

الاسبوع الفائت ايضا حضرت مناسبة .. وهذا الاسبوع مناسبتين …

كانت كل الأفراح اللي رحتها لأقارب أو معارف وأصدقاء .. وتقريبا كلهم من نفس الطبقة الأجتماعية  ( المتوسطة الحال) وليست الغنية جدا .. والحضر J

هذا الاسبوع  حضرت فرح صديقتي التي تزوجت  (قبلياً) .. ولست أقصد الأستهزاء أو السخرية والتجريح .. أبداً .. كل مافي الموضوع أني مستغربة من الوضع .. وشي جديد بالنسبالي ..

تفاجأت منذ دخولي بالعدد الكبير جدا من الناس .. واللي نصهم ( اطفال) مع انه مكتوب في الكرت جنة الاطفال منازلهم .. أقول مرة اخرى لست معتادة على رؤية أطفال في مناسبات  كحفلات الزفاف .. الاطفال مكانهم البيت في دي الاوقات .. والغريب في الموضوع انه الاطفال ليسوا فقط يسرحوا ويمرحوا بين الطاولات ويلعبوا واحد طش .. لا البنات كمان فوق الكوشة وجالسين يرقصوا مع الحريم …:|

ياجماعة بالله بنت مفعوصة عمرها 5 سنوات المفروض تنام من الساعة 9 ونص عشان تلحق تقوم من الصبح قبل لاتشرق الشمس تجلس قدام سبيس تون  تستنى الفلم الكرتون المفضل عندها .. ولا تجلس للساعة 2 بالليل فوق الكوشة مع الحريم ترقص …! لا ويشجعوها كمااان L ..

معليش بس كل مين يعيش عمره .. يعني اصلا البنت المفروض ماتروح الافراح غير لما يسير عمرها 12 و13 سنة .. قبل كدا ماتروح غير لأقرب الأقربين .. بعدين لي ان شاء الله تطلع فوق الكوشة وترقص .. المفروض ماترقص غير لفرح اختها وبنت خالتها بس مو كل من هب ودب قامت ترقص في فرحه ….!

من الاشياء اللي تقهرني في الافراح ( كل الناس سواء بدو ولاحضر)  التأخير في الزفة .. يعني ياناس والله مرة تعب .. نجلس نستنى من 11 ولا 11 ونص اليييين الساعة 2 بس جالسين نتفرج عالرايحين والجايين .. حتى كلام مانقدر نتكلم بسبب الصوت العالي .. اللي يصدع ..  وفي ناس يجلسوا لبعد2 ..  صحبتي الين 2 ونص ولسا ماانزفت .. وماحضرت الزفة بس دخلت وسلمت عليها مع بقية البنات .. يعني العروسة جاهزة ليش ماتزفوها وتخلصونا .. !!!

يقلك لا حرام فلوس القاعة والتعب اللي خسرانيين عليه .. طيب بالله العروسة مو هادي ليلتها .. يعني تجلس نص ساعة بس عالكوشة وبعدين تمشي .. ؟؟

طيب وصحباتها ماتبغى تهيص وتجلس معاهم !! وفي ناس بس يشوفوا العروسة بتنزف ويمسكوا الباب .. طيب بالله ايش الفايدة لما تنزف ونص الطاولات فاضية ومابقي غير اهلها ..؟؟

بعدين صح .. ليش في أفراح البدو العشا قبل الزفة << دا الشي أستغربت منه في فرح صحبتي .. ؟

أشياء تانية كمان تقهرني في الأفراح ..

ليها داعي علب الملكة والسفن والقوارب والاشياء دي الكثير ؟؟

له داعي لما يزفوا 10 عرايس في نفس الفرح .. يابنتي مو اتزفيتي في فرحك خلااص حتى في فرح الناس تبغي تنزفي ؟؟

له داعي لما يعزموا في الفرح 400 وحدة في قاعة كبيرة والخساير على العريس وجيبه ؟؟ ايش احلا من انه يحضروا فرحي الصغير 150 وحدة بس في فندق صغير مرتب ..و يخلص الفرح الساعة 2 ؟

له داعي لما يحطوا أغاني مال أمها داعي في الفرح .. << رحت فرح قريب حاطين ياتاكسي !!  بالله ايش المسخرة دي لا وكمان يرقصوا عليها .. بنت خالتي بتحكيني راحت فرح حاطين بحبك ياحمار !!!!

اخيرا .. ماأقصد ابدا أني أستهزء بناس معينين .. أو جنس معين ..  ابداً كلكم عالعين وعلى الراس وزي ماأنا شفت سلبيات في البدو وغيرهم .. أكيد في سلبيات عندنا برضو ..

          من الأمور الطريفة التي حصلتلي في فرح صحبتي .. كنا أنا وأمنية J وأثنين من صحباتنا جالسين .. وكانوا بيدوروا بالمباخر ..وطبعا توقف عند كل وحدة وقت عبال ماتتبخر .. جات الحرمة عند أمنية .. البنت تضحكلها ماهي عارفة ايش تسوي .. جات عندي حركت يدي شوية بس وطليت فيها .. جات عند الثالثة سوت زيي .. طالعت فينا الحرمة وقالت شكلكم حضر ماتحبوا البخور J ..

لاتزعلوا مني .. والله يهني سعيد بسعيدة J

Advertisements

15 تعليق

  1. يلا عقبالك …..

    اسمعي سؤال … يوم فرحك … راح ترسلي الدعوات … كروت الكترونية !

  2. ملياني ..
    ليش لا ..
    وحدة من صحباتي عملتها ..
    وكان الكرت من تصميمها ..

  3. هندوشه ..
    مممممم , كل ناس ولهم عاداتهم وتقاليدهم في الأعراس ..
    والأغلب الحقيقة ما تعجبني .. بس مو معناته أنهم غلط وانا الصح !
    انا عن نفسي زواجي ان شاء الله حيكون في البيييييت ..
    بعيداً عن ” وجع الدمااااغ ” ..

    تجين 😛 ؟؟

  4. نوفا ..
    أعرف .. أنا أنتقد بعض الأشياء اللي شفتها لفئة من الناس ..
    بس برضو حتى عندنا في أشياء مالها داعي ..

    حلو في البيت .. أفكر أسوي زيك .. نختصر الموضوع والفلوس بدل ماتروح يمين وشمال نسافر بيها .. نهاجر نهج 🙂

    جية ان شاء الله .. بس اهم شي الفرح مافي اطفال << هاذا وهيا رياض أطفال ..
    شكرا على مرورك ..

  5. ترا سالفة عندنا وعندكم ما أظنها راكبه !
    ما أحس فيه فرق ( ترا زواجاتنا مو زي اللي رحتي له 😉 ) !!

    ما فيه أطفال .. .. مممممم ما أظن ..
    حيكون مليااان ما شاء الله بزارين اخوي وخواتي يكفون !!

  6. بصراحه نحتاج مكاتب تنظيم حفلات الزواج لانو العريس والعروسه مساكين يرتبون ايه والا ايه الله يعينهم من تكاليف القاعات والجشع اللي فيها والخدمه السيئه وترتيبات الزفه والبيت ومصاريف الأثاث هذا كلو ولسا باقاي ما بعد ليلة الفرح ….

    وبعدين سالفة الأطفال انا اعتبر اللي تترك اطفالها عند اي احد وتحضر زواج عندها مشكلة في امومتها ….

  7. نوف ..
    للأسف هوا دا الواقع ..
    خلاص يااختي أجي فرحك وأحكم ..:)
    وبنات أخواتك وأخوانك على راسي .. نتعرف عليهم برضو ..
    بس المعازيم لا لحد يجيب أطفاله ..

    فيصل ..
    دحين في جدة في مكاتب تنظيم افراح .. الفكرة جديدة وغالية الثمن شوية يعني ماتناسب كل الفئات << اللي عنده تصحيح للمعلومة يقلي ..

    مو اي احد تترك اطفالها عنده ..
    تتركهم مع زوجها .. مو ابوهم برضو ؟
    تتركهم عند امها .. ماعندها احد لاتجي ..
    اما تجي وتجيبهم .. اصلا مساكين الاطفال يكونوا في جو افراح .. ينكدوا ولايقدروا يناموا وازعااج بالنسبالهم ..

    انا اقول ليش مايكون في دور رعاية للاطفال ولا حضانات في قاعات الافراح ؟؟
    فكرة جيدة ولا مو ؟؟

  8. فكرة جديده حلوه ومالك علي يمين حاولت اطبقها في زواجي بحثت عن من ينفذها قالولو ترا العقل نعمة خلك في الاهم ..

  9. هعع ..
    ايش اللي موقفنا غير التحطيييم ..!!

  10. شوفي انا قاطعت الافراح ولا احضر فرح الا لأقرباء من الدرجة الأولى.. و الان بيخلص لنا سنة ماعتبت فرح.. و السبب كثرة النميمة والغيبة في الرايح و الجاي..و لو بحضر فرح و يطلع ملاهي ولا حضانة باحط عليها اكبر X ولا عاد ادخل فرح لا قريب ولا غريب..

  11. هه

    يا ستي كان غيرك أشطر

    أنا قلت كده برضوا و لما جا وقت تحضير الزواج لقيت إنو أهلي لحالهم تقريباً حوالي ١٠٠ شخص هادا غير أهل العريس

    بس الحمد لله ما كان في أطفال غير ثلاثه بنات صغار و جالسين مكانهم و عدت على خير

  12. أمل ..
    امم .. اعرف ناس سووها .. بس انا مني مع دي الطريقة .. الواحد يسوي الواجب ويروح للناس ( مو كل الناس ) على الاقل اللي يعزوا علينا والاقرباء طبعا ..
    اقلك على شغلة .. انا وعائلتي من الناس اللي مانحضر افراح بأغاني فتقل طبعا النسبة مرررة كثير ..
    شكرا على مرورك 🙂

    اسراء ..
    ماشاء الله تبارك الله ..
    لالا يااختي نقلهم الفرح مرة مختصر ومدري ايش بس نعزم الاقارب من الدرجة الاولى يكففوا ..
    ماشاء الله حاسبة الاطفال 🙂
    شفتيهم وانتي بتنزفي هه

  13. يالله ياايانق كانك حاسه فيا
    بصراحه مررره يعجبني لمن يكون الفرح مرتب وصغير وهاديء وطبعا من غييييييييير اطفاااااااااااال<<<مين يسمعك؟؟

    اما على حكايه البخور والحضر كل ماافتكرها افطس ضحك ،احس اشكالنا كانت شاذه بينهم <<باين اننا مانعرف دي الحاجات
    مشيييييييييييها

    عقبالك ياعسل وعقبال مانهيصلك في فرحك 🙂

  14. يووووووووووووووه يا هنودة انا لي سنين وسنين ما حضرت أفراح سعودية!! آخر فرح حضرته كان mix سعودي-ماليزي هو زواج أخويا اللي أكبر مني وبعده بشويتين كان زواجي 😀 حتى زواجي أنا ماكان سعودي كان ماليزي أكتر شي باعتبار اني عملته هنا..

    آخر مرة رجعت فيها السعودية وافق مناسبات كثيرة من زواجات – حفلات مواليد ……..الخ بس كلها ما رحتها أحس المناسبات هدي المفروض الواحد يفرح فيها.. بس مع التكلّف الزايد بتشوفي أصحاب المناسبة شايلين هم اكتر من كونهم فرحانين!!

    اما حكاية البخور حكاية خخخ
    ذكرتيني بموقف حصل في زواج أخويا كنا جايبين أشياء الملكة على الطريقة الماليزية وهي تجيكي كدا حاجات قطّاعي يعني الله يكرمك الساعة في علبة لحال مزخرفة – الهدايا لحال كمان….الخ مو زي عربيّات الملكة اللي عندكم.. المهم؛ وحدة من الضيوف سمعتها تقول للي جمبها: اش فيهم جايبينها قطّاعي 😀 >>> لا تسألي عنها وقتها خخخ

  15. عفوا غاليتي
    أنا قبلية _ بدو مثل ماتقولين-
    حلو إنك تذكرين السلبيات وتقترحين حل لها
    وحلو إنك تعترفين إن الحضر لهم سلبيات كما -للبدو-سلبيات
    لكن الأجمل أن نرى الدنيا بعين فضلى
    أي عندما أأتي وأنقد شي طبيعي في حياة أناس أخرين وتحت تصرفهم وحرية رأيهم وعاداتهم>>سيكون نقد مرفوض ولا يندرج بتاتا تحت حرية الرأي
    والكثير من زيجاتنا تكون بعيدا عن حضور الأطفال”كلٍ على هواه”
    ــــــــــ
    أما من ناحية نصيب العروسة اليتيم من حفل زفافها لاشك في أنه بإمكان أي عروس تغييرها>>أذكر حظرت زفاف عروسة حظرت من الساعة 12,5 حتى بعد العشاء بقيت مع زميلاتها والضيوف
    ولم ينتقدها أحد
    ـــــــــ
    على فكرة أنا مثلك ماأحب أحضر أي زفاف إلا في الضرورة وأكون مجبرة
    وعلى السلبيات التي أراها ولا تعجبني لم انتقدها
    لأنها فرحة والكل يعبر عنها كما يريد
    لا علاقة لها ببدو وحضر عفوا أقصد قبائل وحضر
    ــــــــ
    أتمنى غاليتي أن تتقبل تعليقي بصدر سعيد
    وبالتوفيق

    .
    .
    .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: