أبو …!



تزوجت احدى صديقاتي منذ عدة سنوات .. بعد تخرجها من الثانوية العامة .. صديقتي هذه أعرفها منذ عدة سنوات .. يعجبني فيها حماسها وتطلعها الشديد للمستقبل .. كانت ممتازة .. ذكية .. حِركة .. حبوبة وليها سمعة جميلة في مدرستها ..

بعد زواجها .. أنجبت صديقتي فتاة جميلة .. وأعتقدت أنه أصبح من الأفضل أن تعتني بهذه الفتاة حتى تتخرج وتستقر ..

اثناء حديثي معها في احدى المرات قالت لي

– أبغى أجيب ولد

– يابنتي اتخرجي أول .. دوبك تحكيني تعبانة في القسم ومع بنتك

– اهل زوجي وزوجي بيضغطوا عليّا ..

– نعم !!.. لسا العمر قدامك وهادي اول خلفتك .. وان شاء اله تجيبيلهم بنات واولاد بس استني اتخرجي اول

– انا مرة مضايقة .. يقولولي ليش ماجبتيلنا ولد و فلانة جابت ولد وانا ماجبت وخطيبة زوجي اللي راحت جابت ولد و…

– لاتجلسي تقولي زي كدا البنت احيانا تكون افضل من الولد وتهتم بأمها وابوها أكثر .. وربنا يجيب الطيب .. لاتجلسي تعترضي على قضاء الله بعدين أهم شي انو صحة طفلتك ممتازة والبنت بخير .. ماتعرفي لو جاكي ولد يجيكي معاق ولا مشلول .. قولي الحمد لله ..


الكلام اللي فات حقيقي .. وأكثر من مرة أتعاد دا الحوار بصيغ مختلفة .. صديقتي أصبحت متشائمة قلقة .. لم يعد يهمها الكثير من الحياة الا أن تنجب صبيا .. وفقط !!

لااعرف إن كانت صديقتي حساسة اكثر من اللازم أم أن الموضوع ذو حساسية بالنسبة للأمهات ..

اللي اعرفه انو الذرية من الله .. والمرأة أصلا غير مسؤولة عن تحديد جنس المولود .. لااعلم لماذا يصب الزوج وأهله جام غضبهم على الزوجة المسكينة وكأنها (دجاجة) اذا لم يأت المولود على حسب هواهم ومزاجهم يقولوا .. اللي بعدو !!

اذا كان الولد هو سند أبيه ومن يحمل اسمه .. فالبنت هي سند والدتها وهي من تقوم على رعايتها وأبيها وهي من تدير المنزل بعد والدتها ..(وأسألوا العائلات اللي مافيها بنات ) ومن المعروف أن البنات أبّر من الأولاد والبنت بعد زواجها تأتي هي وزوجها وأطفالها عند أهلها .. أم الولد فيبقى مع أهل زوجته ..!


هل من الممكن أن أسمي هذا الموضوع .. تخلّف ؟

واستمراراً لجاهلية وأد البنات ؟؟


Advertisements

19 تعليق

  1. ممممممم .. عجبي !
    لسه في ناس تفكر كذا ؟!
    أعرف أنه الأهل يحبون يكون عندهم أولاد .. بس قصة جيبي لنا ولد وهذي جابت ولد وانا ما جبت والخوف ونظرة الزوج وأهل الزوج !!!
    وييييييين .. الله يعافيهم ولا يبلانا !

    انا أبغى ولدين وأربع بنات .. يااااا رب يحقق لي اللي ابيه 🙂 ..
    ويرزقك انتي يا هنوده , وكل من يقرا ردي ^_^ ..

  2. نوف..
    ايوا لسا .. تخيلي !!
    مااقلك ماتتمنى ولد .. تتمنى .. شي طبيعي كل واحد يتمنى اللي مو عنده .. بس هادي مو طريقة ..
    آميين يارب .. بس انا ابغى اقلص العدد شوية ..
    ماابغى دوش دماغ 🙂

  3. ببساطة ..
    تخلّف ..

    أصلاً أهل زوجها إيش لهم شغل ؟؟؟؟؟

    ما لهم صلاح .. حتى لو هي و زوجها قرروا إنهم ما يخلّفوا .. براحتهم .. أهل زوجها و أهلها ما لهم أي علاقة و ما لهم صلاح يحشروا نفسهم في ما لا يعنيهم ..

  4. بندر ..
    يعني تخلف ..
    اهل الزوج مشكلة عالمية ترى .. مرة في دكتور فيل مشكلة بين الزوج والزوجة وأهله ..!
    مااعرف متى الناس تسيب بعضها وتبطل تتدخل في الشي اللي مايخصها
    ..

  5. يووووه
    طبعا أهل الزوج مالهم دخل بتاتا البتة والمنطق والشرع يقول كدا ..بس فين تودوا العادات السخيفة

    ترا مجتمعنا كدا ولسا كدا وح يستمر كدا ومااتوقع انو حيتغر بدي السهولة

    ..وهادي المشاهدات واقعية ومتكررة

    فليش انتو مستغربين قد كدا عااادي نعيش ونشوف ..
    بعدين على فكرة ..الأيام دي معد في فرق بين الولد والبنت الا في الأسماء بس ولا في المظهر والتصرفات سار الولد بنت والبنت ولد ..

    دايما يقولوا الولد ظهر وسند وعزوةويرفع اسم ابوه (مدري اش دخل يعني البنت مثلا ح تنزل اسم ابوها؟ )>>عالم غريبةوهوا دا اللي يخليهم يحبوا االولد

    البنت سايرة تنفع اكتر من الولد بالذات لما ح تسوق
    الله لايعوقها بشر

    المهم..الحكاية حكاية عادات متوارثة محا تتغير في يوم وليلة وأهل الزوج والمجتمع حيستمروا يفضلوا الولد ع البنت

    >>عن نفسي أحب البكرية تكون ولد
    >>>نوف >>مطبقة مبدأ للذكر حظ الأنثيين ولا شو؟؟
    الله يرزق الجميع ويفقهم يارب

    شكرا اهنود

  6. سفانة ..
    عاد انت ادرى بدي المواضيع مني ..
    يعني اذا المجتمع محا يتغير ايش نسوي ؟؟
    نحط يدنا ع خدنا ونستنى رضا الناس !!
    المشكلة ياسفانة لما يجي الولد ويسوي مصيبة في حياته يقولوله الله لايرضى عليك شوهت سمعتنا !!
    يعني حتى مايقولوله فكر في نفسك ايش حيكون موقفك مع الناس .. اهم شي سمعة العيلة لاتطيح وينكسر صحن الجلي ..
    حتى عقوبات الشرع ماساروا يخافوا منها قد ايش الناس تقول عنهم !!!
    >> ان شاء الله بكريتك تكون ولد .. مع اني احس البنت حلو عشان تريح أمها ..
    آمين يارب ..
    شكرا عالمرور .. 🙂

  7. تصدقي اينوقة .. في وحدة من عيلتي في عمري تماما

    تزوجت صغيرة وهي في عمر 16 سنة وجابت الخلفة الاولى بنت

    تكلموا اهل زوجها وقالوا نبغى الولد .. ماجات السنة اللي بعدها الا وهي جايبة البنت الثانية طبعا اكلولها راسها وبما فيهم زوجها جات السنة اللي بعدها جابت البنت الثالثة ..
    فزوجها بكل بساطة قلها .. لو المرة الرابعة جبتي بنت حطي في بالك اني حأتزوج وحدة ثانية ..

    والحمد لله ربي من عليها بالولد ..
    بس تورطت بأربع اطفال فوق بعضهم وهي في عمر ماتعدى 22 سنة !!
    والسبب نفس المشكلة المتوارثة

    انا بس نفسي اعرف لييش يحطوا الغلط على الحرمة كأنوا بيدها الخلفة ..

    بس انا متأملة انو جيلنا يكون افضل ونعلم اللي بعدنا انو كل اللي يجي من ربنا كويس سواء البنت او الولد ..

  8. تخلف + غباء + تفكير رجعي = سعودي

    أصلاً أهل الزوج إشلهم دخل

    و بعدين الزوج المفروض ما يسمح لأهله بدخلوا في حياته الخاصه

    إلا إذا معاهم فالله المستعان

    خليها تجيب و إن شاء الله يرزقها الولد و معاه راحة البال

    ترا العيشه ما تنطاق لما يكون أحد قاعدلك كل شهر

  9. غريبة الناس ، نسيت حديث الرسول صلى الله عليه وسلم ، خيركم من بشر بالبنت ،
    انه تكون اول خلفة له بنت …

    وفي حديث ثاني ناسيه لكن يفيد ان الي عندو بنتين في الجنة …

    ترى على فكرة … من قال ان واد البنات انتهى !

    واد البنات موجود حتى اليوم … لكن بصور مختلفة …

  10. ااااه هالموضوع يرفعلي ضغطي
    وش تفرق البنت عن الولد ..
    والله العظيم في وحده كانت معترضة على اللى ربي رازقها وكل صارت تجيب بنات بنات بنات وماجاها ولا ولد 😦
    مايجوز الاعتراض على اللى رزقها رب العالمين المفروض يحمدون الله ويشكرونة وربي بيرزقهم ان شاء الله الاولاد والبنات
    يمكن البنت احسن من الولد تكون وتبر في والدينها

    — عقووول متخلفة جدا جدا جدا !! —

  11. طيب ، يمكن تجيب بنت مرة ثانية ….

    ؟؟؟؟!!!!

  12. أودة ..
    طبعا .. مو هوا اللي بيحمل ويولد .. على باله تفريخ .. واللي يدو في النار مو زي اللي يدو في الموية ..
    وبعدين يقلها جايبه الأولاد دول كلهم زمنتي عارفة تربيهم !!
    دايما كدا أصلا 😦
    وكمان يهددها يتزوج عليها .. بصراحة مع نفسو واحد زي كدا مايستحق ينحب << عصبت 🙂
    نورتينا أودة 🙂
    اسراء ..
    مو المشكلة لما يزنوا عليه الين مايدخلوا الفكرة في راسه مع أنه مافكر اصلا !!
    أنا افتكر ايام ماكانت حامل زوجها قلها أبغى بنوتة حلوة .. ودحين زعلان طبعا من ورا أهله ..
    يلا .. الله يرزقها الخير ان شاء الله
    ياهلا فيكِ 🙂
    محمد ..
    ماأكثر الأحاديث اللي تتكلم عن فضل البنات .. ولو أبغى أنزلها حتشوفوا كيف فضلها الكبير ..
    بس العقول المتحجرة أيش تسوي فيها ..
    يعرفوا يطبقوا السنة على اللي يهواهم .ز بس الل مو ع هواهم ولا كأنهم سامعين ..
    أيوة موجود لسا .. للأسف ..
    بس أحيانا أقول استغفر الله أحسلها تتوأد ولا تعيش عيشة مستواها أقل من الحيوانات في بعض البلدان ..
    شكرا عالمرور ..

    مضيعة بيتهم ..
    ياما سمعنا عن بنات كانوا قمة في البر بآهاليهم .. والولد هوا الللي متعبهم في حياتهم ..
    الحمد لله عالنعمة ..
    نورتينا ياستي 🙂

    رادار ..
    عادي اللي بعدو .. الين مايسير عندها درزن ماتعرف تتصرف فيهم ..!!
    ياهلا فيك 🙂

  13. آآآآآآآآآهـ متى يفوق المجتمع السعودي بس من دا التخللللللللف؟؟؟
    والله شي مررره يقهررر وينرفز ،الاهل مااالهم دخل في الزوجين بعدين، كأني سمعت معلومة ان اللي يحدد جنس المولود هو الذكر وليس الانثى بس مدري متى الرجال يفوقوا !!!
    الواحد يحمد ربه على نعمة الذرية ، فيه ناس كتييييييير يتمنوا اي شي المهم بيبي ،قولوا الحمدلله ع النعمة…
    وانا اقرأ أفتكرت قصة وحده أعرفها ،قبل ماتتزوج كانت تتكلم مع امها وبعدين قالت يووووه ماأبغى اولاد يطفشوا،الحرمة دحين اتزوجت وماشاء الله خلفت الاود وبنات بس اولادها كلهم عندهم مرض عضال مااعرف اش هوا بالضبط بس انه يبدأ ياكل العضلات من يوم مايتولد الين مايوصل لعضلة القلب :(… ومسكين دحين تشوفي الولد حالتة مرررة تحزن مايقدري يمشي ولايحرك يده بعد ماكان وهو صغير سلييم ومافيه شي..الله يشفيه ويرفع عنه (لاتنسوه من دعواتكم أمه وابوه حالتهم النفسية تعبانه) وقولوا الحمدلله

    **إسراء:تخلف + غباء + تفكير رجعي = سعودي
    ياشيخه الله يسعدك من جد جبتييييييييها
    مشكورة هندو على اثارة الموضوع
    وآسفة ع الاطالة ..بس الموضوع نرفزني شوية

  14. أمنية ..
    << اشوفك دخلت جو 🙂
    ايوة صح معلومتك صحيحة .. مو هما يعرفوا يتفلسفوا بس مايعرفوا يتأكدوا من صحة معلوماتهم ..
    والله يرفع عن قريبتك ان شاء الله .. شي يخوف لما الواحد مايحسب كلامه ويجي الابتلاء بعدين .. يارب نسألك السلامة والعافية ..
    والله يعينهم على ماهم فيه ..
    **
    هههههههه
    لايجوا يضاربوا معاكم بس ..
    العفو حبيبتي .. خدي راحتك دي مدونتك ومطرحك 🙂

  15. شي غريب وتخلف انه يكون عندنا مثل هالتفكير

    الي بقوله

    ارفع راسك انت سعودي غيرك ينقص وانت تزودي…. 😉

    شكرا لك على الموضوع

  16. كانكِ تحكي عن أختي والله انا أختي ولله الحمد في آخر شهر لها طبعا اول مولود يوصل إن شاء ربي وطبعا كل اللي حولها ربي رزفهم اولاد والله والله تعرفوا كيف عانت من اللي حولها بالحرف الواحد كذا يقولوا وجراءة كمان

    {{ ها جيبي لنا الولد الصالح }} هي هي خير إن شاء الله يعني البنت حتنزل روسكم ولا ايش الحمد لله هي وزوجها فيهم قناعه ماشاء الله ولا قوة الا بالله ودائمآ العبارة المسموعه (( اللي يجي من الله حياه الله ))

    بس غريبه رجعوا للعادات الماضيه يعني يحسسوني انه البنت عار والعياذ بالله بجد مشكله وكمان كبيررررررة

    اما عن صديقتك المفروض تطش كلامهم ولا تحاول إنهم يتقربوا منهم بهذا الموضوع اعتقد يخص العائله يعني الزوج وزوجته !!! صح

    امممم اليوم إن شاء الله أختي حتكشف اتمنى انها البنت تطلع على خالتها هع

    والله يجي من الله حياه الله ياسعوووووووووودين

  17. رزفهم= رزقهم

    تطش = تطنش

    سوري على الإطاله

  18. الورد .. ياهلا شرفتنا 🙂
    ايه سعودي .. نشوف ايش آخرت السعوديين 🙂
    العفو ..
    ..
    أماني ..
    يارب تولد أختك بالسلامة .. وتجيها الذرية الصالحة ..
    أهم شي ماتتأثر بكلام الناس .. ترا لو حتسمعلهم محا تخلص ..
    من يومهم الناس كدا .. هوا يخصهم صح بس لو الزوج في صف أهله ايش نسويله .. نقول عقله صغير !!
    يارب تجيكم أحلى بنوتة وتقلك ياخالتو .. بس هاا من دحين لاتتسلطي عليها وتطفشيها .. أعرف الخالات الصغار ايش يسووا 🙂
    بس ترا بيني وبينك .. الله يعينك .. أعرف وحدة كانت تقول ( الخالة شغالة) عشان طووول النهار مبتلشة ببنت أختها هعع
    حياك الله أمونة 🙂

  19. i will not get married because i want to keep the name of my father

    but girl or boy it s the same and we shall not make the difference,i hope that man change this bad idea

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: