واجب ..

مرر هذا الواجب لي الأخ صارخ بصمت والأخت مضيعة بيتهم وكوني ماعمري

حليت واجب .. وبعد تمرير واجبين لي انتهى بالطناش .. قررت أنو تكون الثالثة ثابتة

وأحلهم ..

أقوم بحل هذا الواجب وقت انقطاع الكهرباء عن حينا واللأحياء المجاورة

.. والساعة 1 الضهر .. البيت لسا محتفظ ببرودته والهربا ليها مطفية ساعة .. بس

الله يستر وتنفتح ان شاء الله ومايزودوها علينا ..

نجي للسؤال الأول :

أفضل مرحلة دراسية مرت عليّا ؟

أقدر أقول أنها بداية دراستي (التمهيدي) الى مرحلة 3 ابتدائي قضيتها

في مدرسة نور القرآن الأهلية في جدة ..

وبصراحة كانت أجمل أيام عمري والحمد لله ..

ثمتوسط كمان كانت مررة حلوة .. و2ث .. جننت الأبلات ماسبت وحدة الا عملت معاها مشكلة 🙂

أسوأ مرحلة تعليم

الرابع الإبتدائي .. نقلت لمدة سنة في مدرسة الله لايوريكم .. بس عرفت

فيها الدنيا ع حقيقتها 🙂

أفضل المدرسين اللي مروا عليك ؟

والله كثير .. وأخاف أقول أسماء وأنسى أسماء .. بس إلى الآن ماأنسى

معلمتي أ. سناء أبو لحية اللي أخبارها منقطعة عني بعد ماسافرت لفلسطين وأنا في ثالث ابتدائي<< كانت معلمتي في الروضة

.. أبلغها

التحية .. وأقلها أني حفظت القرآن ولله الحمد وطبقت وصيتها :)<< أهدتني مصحف وأنا في داك السن

وكتبتلي عليه أني أتمم حفظ القرآن .. الله يجزاها كل خير

..

أحب المواد اللي درستها ؟

امم .. في المدرسة كنت أحب مادة التعبير جداً واستنى حصتها بفارغ

الصبر .. والحمد لله كنت أبدع في دي المادة وكم مرة بكيت المعلمات اللي مروا عليا

من مواضيعي ..

مادة المحفوظات والنصوص والأدب : لأني كنت ألحن الأبيات اللي تمر عليا

وأعمل منها نشيد .. واحيانا كنت أطلع فوق طاولة الأبلة وأغنيها بصوت عالي والبنات

معايا وكم مرة دخلوا علينا الأبلات واحنا في دي الحالة ..

مواد الدين .. مرررررررة كنت أحبها وبطبيعة دراستي في مدرسة تحفيظ مرت

عليا مواد دين مرة كثير .. وأقربها لقلبي الفقه والتفسير وعلوم القرآن والمواريث

..

التاريخ : بسبب الأستاذات اللي مروا عليا .. مرررة حبيتها وفكرت

أدخلها تخصص في الجامعة

اللي مرت عليك ؟ أكره المواد

الجغرافيا .. جات فترة اتعقدت منها .. بس سلكت مع السالكين ولله الحمد

الرياضيات : اتعقدت منها في ثالث متوسط ومعد درستها بعد كدا

النحو .. برضو كنت أتنح في دي المادة كثير .. بس على آخر السنوات جبت

درجات عالية فيها

الأنجليزي : الوحيدة اللي ماسلكت .. وعانيت الأمرين فيها .. بس نجحت

فيها بممتاز من التوجيهي !!

آخر شهادة علمية حصلت عليها , وتخصصك ؟

الثانوية العامة \تحفيظ قرآن

وأدرس حاليا رياض أطفال في جامعة أم القرى

أطرف موقف مر عليك في دراستك ؟

امم والله كثير .. اصلوا انا كنت من الناس البارزين في المدرسة وليا

شقاوتي المعروفة 🙂

اقلكم ع موقف صغير .. مرة كنت بأجري وصحبتي بتجري ورايه ..( مطاردة

يعني ) فجأة أنا مع الجري خبطت في وحدة .. أطل فيها الاقيها المديرة ببطنها (كانت

حامل ) طبعا هيا طلت فيا وقالتلي : الله يهديكي وانا حتى كلمة أسف من الفجعة ماقلت

🙂

أفتكر مرة كمان في الفسحة ضاعت عليا الخمسة حقتي .. رحت طلعت فوق

المسرح (كنت من بنات الإذاعة ) وشغلت المايك وقلت للبنات بنااااااااااااات من شاف

الخمسة حقتي .. طبعا البنات ضحك وشوية طلعتلي المديرة قالتلي تعالي المكتب .. طبعا

انا انفجعت ودخلت عندها ابغى اتأسف الا طلعتلي خمسة وقالتلي روحي افطري 🙂

أصعب موقف مر عليك في دراستك ؟

لما كنا نوقف أيام التوجيهي جنب القاعات ويجوا يطاردونا ندخل .. وأنا

اقلهم الله يخليكم بس المعلومة دي 😦

من جد كانت حاجة تخوف .. غير مادة المكتبة اللي دخلتها من دون مذاكرة

في التوجيهي ونقصت فيها فوق 10 درجات ..<< هيا اللي خسفت المعدل .. والحمد

لله

ومن أصعب المواقف كمان لما كنت أكتب التعهدات في المدرسة .. أفتكر أنو أول شي سويته لما أستلمت الملف .. أني دورت على التعهدات الي كتبتها موجودة ولالا 🙂

أمرر الواجبات ل :

اسراء بيت المال

أوده

أمنية العمر

خوخة

عبدالله حكيم

همسة نغم

نوف

شدا

القائد

وكل اللي يحب يحلو

🙂

أتفتحت الكهربا 🙂

Advertisements

7 تعليقات

  1. معليييش عالكركبة
    مو راضي يتحرر وطفش اهلي .. غمضو عينكم 🙂

  2. و بعدين معاكم إنتو و الواجبات

    أنا ما أحب أحل الواجبات

  3. هههههه والله ياهنود طلع عندك ماضي شقي

    بس فلة .. لما ترجعي تفتكري دي المواقف والذكريات

    تبتسمي من قلب لانها كانت بكل شقاوتها بريئة 🙂

    الله يزيدك من علمه .. ويجعل القران شفيع لك بإذن الله

    ولا تنسيني من الشفاعة 🙂

  4. خليهم يقارنوا بين شقاوة بنات التحفيظ وبنات المدارس العادية بنطلع نحن ملايكة 😀
    هنود
    لسة فاكرة شي من القراءات?
    قبل كم اسبوع كنا نتفرج في برنامج أكاديمي القرآن هو برنامج ماليزي ومهتم بالقراءات والتراتيل.. وكل ما جا واحد هزأني زوجي وقال حرااااااااام عليك لو ما درست أولادك وانت درستيها!!

  5. هههههههههه

    حركات ..

    يعني حليتي الواجب وانا كنت فاقد الامل

    هع هع

    استمتعت بالقراءة

  6. السلام عليكم ورحمة الله وبركاته
    صدفة دخلت لهذه الصفحة لأجدك تذكري أختي سناء أبولحية بالخير
    وأطمأنك أنها ولله الحمد هي بخير وعافية وماشاء الله لديها 7 أبناء
    أكبرهم عبد الرحمن ثم سلمى ثم بثينة ثم محمد وحسام وساجدة وأصغرهم وعمره أسابيع اسمه أيمن الله يحفظهم جميعا
    دعواتك لها والله يجزيك الخير

  7. […] هذا التعليق على موضوع واجب قبل عدة أسابيع […]

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: